طقطقة البراغي

مين فينا ما سمع عن طقطقة البراغي باللهجة السورية ؟؟؟؟
مين فينا ما عمرو طقولو برغي طلع من راسو؟؟؟؟ طيب عمرك فكّرت شو معنى البرغي...البرغي باختصار: هو ضحك بالوجه ومن وراك بيحكي عنك للمسؤول بكلام صحيح أو كذب وإنتا بتضحك وبتلعب ومابتعرف شو صار ورا ظهرك....




أنواع البراغي؟؟؟؟
البراغي أنواع عدة نذكر أشهرها، حاول تراجع البراغي اللي أكلتها بحياتك واللي إنتا ضربتها وشوف بتنتمي لأي نوع:




البراغي الموجّه أو - دايريكتيد برغي
--------------------------
ويتكون هذا البرغي من رأس أحادي يكون موجّه إليك مباشرة من عدوّ لك بالشغل متربص فيك ومستنّي الفرصة وإنتا من شطارتك أعطيته الفرصة فطقلك برغي محترم


البرغي الجماعي أو - ملتي برغي
------------------------
وهذا من أقوى البراغي ويكون مفعوله شديداً وبكون مجموعة من الموظفين بيضربوا موظف واحد... برغي من الآخر عند المدير... وطبعاً لإنهم جماعة المدير راح يعتبر إنهم صح وإنتا غلط..


برغي متعدد الاتجاه أو – ملتي دايركت برغي
---------------------------------
وهذا البرغي بتضربو عند مديرك وإنتا قاصد فيه- والنية بالقلب - شخص معين وإنو ما بحافظ على مصلحة الشغل وإنو ضد مبادئ الإدارة وبالجملة بتلطشلك خمس ست موظفين بالمعيّة مش عاجبينك وشايف إنهم ممكن يضرّوك، وهذا يعتبر من أذكى البراغي لإنك ضربت عشر براغي بحجر واحد...




برغي الرحمة
-----------
وهو برغي نادر تطلقه بحالة تشوف صاحبك تعبان من الشغل ومش عاجبته الشركة والموظفين بيعطوه شغل كتيير فوق طاقته والأخ ممكن من الضغط يروح فيها...فبتروح حضرتك عند المدير وبتلعن سنسفيل أبوه لصاحبك حتى يقوم المدير ويقدم فيه عريضة ويكحشو وهيك بتكون إنتا أطلقت عليه رصاصة الرحمة وخليته يقعد بالبيت معزز مكرم...

البرغي غير الموجه أو- إندايركت برغي
------------------------------
وهو من أقل البراغي فاعليّة يصدر من واحد قرفان زهقان عندو مبدأ عليّ وعلى أعدائي وبروح على المدير وبدال صباح الخير بحكيلو: 'إنتا لو بتضبّ موظفينك بدل ما إنك قاعد ورا الكرسي، ولك شوف شو عم بصير…' وبتصير تسلخ شمال يمين وإنتا مو عارف ليش أو مين بس كل هدفك تفش غُلّك وطبعاً ما تتوقع الشباب حيسيبوك بعدها لإنك لكشت الكل وما إلك صاحب...




البرغي المنعكس أو - ريفيرس برغي
---------------------------
وهو من أغبى البراغي يصدر من إنسان غبي تافه معوّق طافي رايح يدق صاحبه برغي بلاقي حالو إنه دق بحاله برغي !!! مثلاً بتحكي للمدير: 'ترى خالد طول نهارو عم يدخّن بالشركة (وطبعاً الدخان بالشركة ممنوع) والمشكلة إنّو دايماً بتسلبط عليّ وبيدخن من باكيتي.....'


برغي طويل المدى أو - فار ريتشينغ برغي
------------------------------
وهذا البرغي لا يطلقه إلاّ الخبثاء وهو على دفعات وقليل الجرعة بتضلّك تزت براغي صغيرة ومع الوقت بتتجمع عند مديرك إنو فلان الفلاني عليه مشاكل كثيرة ولازم نأدبو وهيك إنتا بتكون كإنك ما عملت إشي – تراكمات يعني – وهادا برغي مضمون النجاح وقد أثبت فاعليته عند الشباب الطيبة
برغي موجّه بالأقمار الصناعيّة أو - سات لايت دايريكتيد برغي
---------------------------------------------
وهذا البرغي ما إلو علاج ولا مضاد حيوي لإنه برغي من شخص واصل من فوق فالأفضل تاخد حذرك من هيك أشخاص مشان تضمن حياة سعيدة هانئة بشركتك




ومتل ماشايفين تختلف البراغي بنوعها وتأثيرها، بس من خبرتي إنو راح يجي يوم أسود عليك ينردلّك كل برغي ووقتها رح تبكي دم على براغيك القديمة ولو سألتني بحكم خبرتي البسيطة


1- عليك بتناول الكثير من فيتامين الوقاية 'فيتامين واو' (الواسطة) لإنها بتشكل جهاز ردع ضد طقاقين البراغي

2- عليك بالإكثار من الحذر والخبث والتحفظ.....ممكن ذلك يخفف فقط ولو إنو البعض يشكّك في ذلك ويقول "اتغدا فيه قبل مايتعشى فيني"
يعني طقلو برغي الصبح قبل ما يطقلك برغي المساء

3- إمشي الحيط الحيط ودايماً قول حاضر ....ولا تقول لأ....ومع ذلك بدو ينطقلك برغي ما بكيفك .. مكتوب عليك

هههههههههههههههههههههههههههههه....
لسا في انواع تانية اللي خدمو عسكرية بيعرفوا

ابن العم انت بتعرف انا ما دخلت دنيا ( العسكرية )
نورنا

هههههههههههههه مشكور أخ محمد عالبراغي قصدي عالموضوع

مشكور أحلى براغي والله

اااااااااااااااااخ


لك من وين كل هالبراغي

شكراً ^_^

مشكووووووووور ابو احمد .....

مشكور ابن خالي

مشكور موضوعك حلو كتير

مشكور

شو هالمواضيع أللي بتهوي حطو شي موضوع يفيد هالعالم لسا براغي وتوقيع ألكتروني أنتو نسيانين وين عايشين أنتوا بالدانا أصحوا اذا نايمين

والله شفيتلي غليلي الي زمان عم نادي وصيح ياناس

اصحوا وهن نايمين ومواضيعن يفتح الله

الحمدلله صار في صوت يساعدني شكرا لك

$الحالـــــــم$

ولك شو يا ابن خالتي ...آكل كل هالبراغي ؟
الله يعينك ومشكور.. ذكرتني بالعسكرية